12-майда АКШнын президенти Дональд Трамп Жакынкы Чыгышка “тарыхый” сапар менен Сауд Арабияга жөнөп кетти. Бул сапарында ал Газа жана Иран боюнча курч дипломатиялык талкууларды ири бизнес келишимдер менен айкалыштырууну максат кылууда. Бул тууралуу Associated Press агенттиги билдирди.
Трамп Жакынкы Чыгышка сапарынын алкагында Сауд Арабия, Катар жана Бириккен Араб Эмираттарына барат. Бирок аймактагы эң курч маселелер башка эки мамлекетке – Израилге жана Иранга тиешелүү.
Анткен менен Associated Press агенттигинин маалыматына караганда, Трамп энергетикалык ресурстарга бай жана Трамп бренди менен кыймылсыз мүлк долбоорлоруна ээлик кылган же курууну пландаган өлкөлөргө басым жасайт. Ал жерде ал АКШнын экономикалык кызыкчылыктары аркылуу өзүнүн сүйүктүү ишин – бизнес келишимдерин ишке ашырууга умтулат.
Вашингтондогу стратегиялык жана эл аралык изилдөөлөр борборунун вице-президенти Жон Альтерман: "Бул анын ыңгайлуу аймагы. Үй ээлери аны меймандостук менен тосуп алышат, келишим түзүүгө шашышат, аны макташат, сындашпайт жана анын үй-бүлө мүчөлөрүн бизнес өнөктөш катары баалашат".
Басылманын айтымында, Трамп Газа жана Иран маселелеринен четтей албайт. Аны кабыл алган Перс булуңундагы өлкөлөр бул эки булактан келип чыккан аймактык чыңалууну жеңилдетүүгө кызыкдар.
Вашингтондогу Жакынкы Чыгыш саясаты институтунун талдоочулары Элизабет Дент менен Саймон Хендерсон: "Трамп АКШнын аймактык стратегиялык милдеттенмелерин ырастап, туруктуу позициясын көрсөтүп, жалпы талаш-тартыштардан алыс болсо, дипломатиялык жеңишке оңой жете алат" дешет.
Маалымат үчүн айта кетсек, Дональд Трамп 13-16-май күндөрү Жакынкы Чыгышка сапар алат. Бул сапар Сауд Аравиянын мураскор ханзаадасы жана премьер-министри Мухаммед бин Салман Аль Сауддун чакыруусу менен болуп жатат.
Жакындарыңыз менен бөлүшүңүз:
Цитата, күндүн саны, кызыктуу үн билдирүүлөрү жана күндүн дайджести - биздин Telegram каналыбызда!
