Рамзан Кадыров кызматтан кетүүсүн суранды

    Рамзан Кадыров Чеченстандын башчысы кызматынан кетүүгө уруксат сурады. Бул тууралуу ал кечээ, 5-майда журналисттер анын отставкасы тууралуу кептерге комментарий берүүсүн суранганда айтып чыкты.

"Мындай ушактарды мен да уктум. Ар кандай сөздөрдү жазып жатышат. Тескерисинче, мени кызматтан бошотууну суранып жатам. Башка бирөөнүн өзүнүн демилгеси, өзүнүн көз карашы бар. Менин өтүнүчүм колдоо табат деп ишенем", — деди ал.

Маалымат үчүн айта кетсек, Рамзан Кадыров 2007-жылдын 5-апрелинде Чеченстандын башчысы кызматына киришип, ал Россиянын азыркы регионалдык лидерлеринин ичинен эң узак иштеген саясатчы болуп калды. Ал акыркы жолу 2021-жылдын сентябрында кайра шайланган. Борбордук шайлоо комиссиясынын маалыматы боюнча, Кадыров шайлоодо 99,7 пайыз добуш менен жеңишке жетип, шайлоочулардын 94,42 пайызы катышкан. Анын азыркы бийлик мөөнөтү 2026-жылга чейин созулат.

Ошондой эле, Medialogia изилдөөсүнө ылайык, 2025-жылдын март айында Кадыров социалдык тармактарда эң көп айтылган аймактык лидер болуп калды – ал тууралуу 166,39 миң билдирүү жазылган.

Буга чейин Новая газета. Европа анын ден соолугу кескин начарлап кеткенин кабарлады. Басылманын маалыматына караганда, Кадыров Чеченстандан кетүүнү токтотуп, убактысынын дээрлик бардыгын Грозныйдагы «Аймед» клиникасынын дарыгерлеринин көзөмөлүндө, ал тургай ошол жерде түнөгөндө да өткөрөт. Маалым болгондой, Кадыровго 6 жыл мурун айыккыс панкреатик некроз деген диагноз коюлган.

“Кавказский узел” басылмасынын маалыматына караганда, Кадыров акыркы сегиз жылда отставкага кетүү тууралуу кеминде бир нече жолу айткан. Ал ошондой эле 2017, 2020 жана 2022-жылдары Чеченстандын лидери кызматынан кетүүгө даяр экенин билдирген.

Эске сала кетсек, буга чейин Рамзан Кадыровдун кичүү уулу 17 жаштагы Адам Кадыров республиканын Коопсуздук кеңешинин катчысы болуп дайындалган. Ага чейин Адам Кадыров Ички иштер министрлигинин облустук башкармалыгынын куратору кызматын аркалап келген.